sc-corporation-subsidy-loans-cibil-score-issue-telangana
తెలంగాణ ప్రభుత్వం ఎస్సీ కార్పొరేషన్ ద్వారా అందిస్తున్న సబ్సిడీ రుణాల పంపిణీలో నిరుద్యోగులకు కొత్త చిక్కులు ఎదురవుతున్నాయి. ప్రభుత్వం ఇచ్చే రాయితీ మినహా, మిగిలిన మొత్తాన్ని బ్యాంకులు రుణంగా అందించాల్సి ఉంటుంది. అయితే, బ్యాంకర్లు అభ్యర్థుల సిబిల్ స్కోర్ (CIBIL Score) ను ప్రామాణికంగా తీసుకుంటుండటంతో చాలా మంది లబ్ధిదారులు ఈ పథకానికి దూరమయ్యే పరిస్థితి కనిపిస్తోంది.
ముగింపు దశకు ఎంపిక ప్రక్రియ
షెడ్యూల్డ్ కులాల (SC) నిరుద్యోగుల ఆర్థికాభివృద్ధే లక్ష్యంగా ప్రభుత్వం ఈ సబ్సిడీ రుణాలు, ఉచిత ఉపాధి యూనిట్లను ప్రకటిచింది. స్వయం ఉపాధి పథకాల కింద దరఖాస్తు చేసుకున్న వారి ఎంపిక ప్రక్రియ ప్రస్తుతం చివరి దశకు చేరింది. అధికారులు అభ్యర్థులకు ముమ్మరంగా ఇంటర్వ్యూలు (మౌఖిక పరీక్షలు) నిర్వహిస్తున్నారు.
ఈ పథకం కింద ప్రభుత్వం ప్రధానంగా క్రింది యూనిట్లను అందిస్తోంది:
-
ఎలక్ట్రిక్ ద్విచక్ర వాహనాలు (EV Two-Wheelers)
-
ఈవీ ప్యాసింజర్ ఆటోలు, ఈవీ గూడ్స్ ఆటోలు
-
రైతుల కోసం సోలార్ పంపు కంట్రోలర్లు
-
గ్రామీణ ఉపాధి కోసం మినీ డైరీ (పాడి గేదెల పంపిణీ)
వరంగల్ జిల్లాలో దరఖాస్తుల వివరాలు
వరంగల్ జిల్లా వ్యాప్తంగా వివిధ యూనిట్ల కోసం మొత్తం 1,648 మంది నిరుద్యోగులు దరఖాస్తు చేసుకున్నారు. ఆ వివరాలు ఇలా ఉన్నాయి:
| యూనిట్ పేరు | దరఖాస్తుల సంఖ్య |
| ఈవీ ప్యాసింజర్ ఆటోలు | 676 |
| ఈవీ ద్విచక్ర వాహనాలు | 433 |
| మినీ డైరీ (పాడి పరిశ్రమ) | 266 |
| ఈవీ గూడ్స్ ఆటోలు | 247 |
| సోలార్ పంపు కంట్రోలర్లు | 26 |
లబ్ధిదారులకు శాపంగా మారిన బ్యాంక్ నిబంధనలు
ప్రభుత్వ నిబంధనల ప్రకారం.. యూనిట్ ధరలో నిర్ణీత సబ్సిడీని మాత్రమే ఎస్సీ కార్పొరేషన్ భరిస్తుంది. మిగతా రుణ మొత్తాన్ని బ్యాంకులు మంజూరు చేయాలి. ఇక్కడే బ్యాంకర్లు అభ్యర్థుల గత క్రెడిట్ చరిత్రను (సిబిల్ స్కోర్) తనిఖీ చేస్తున్నారు. స్కోర్ తక్కువగా ఉన్నవారికి రుణాలు ఇచ్చేందుకు నిరాకరిస్తున్నారు.
క్షేత్రస్థాయి పరిస్థితి (ఉదాహరణ):
నల్లబెల్లి మండలానికి చెందిన జన్ను ప్రవీణ్ అనే యువకుడు ఈవీ గూడ్స్ ఆటో కోసం దరఖాస్తు చేసుకుని, అధికారుల విచారణలో ఎంపికయ్యాడు. కానీ, గతంలో ఇంటి నిర్మాణం కోసం తీసుకున్న రుణంలో కొద్దిగా బకాయి ఉండటంతో అతని సిబిల్ స్కోర్ తగ్గింది. ఫలితంగా సబ్సిడీ రుణ ఖాతా తెరవడానికి బ్యాంక్ అధికారులు నిరాకరిస్తున్నారని ఆయన ఆవేదన వ్యక్తం చేశాడు.
దరఖాస్తుదారుల అవస్థలు
ఈ పథకం కోసం కుల, ఆదాయ, ఆధార్, రేషన్ కార్డులతో పాటు వాహనాలకైతే డ్రైవింగ్ లైసెన్స్, సోలార్ యూనిట్లకైతే పంచాయతీ కార్యదర్శి సర్టిఫికేట్లను తప్పనిసరి చేశారు. వీటి కోసం దరఖాస్తుదారులు రోజుల తరబడి ప్రభుత్వ కార్యాలయాల చుట్టూ తిరిగి అలసిపోయారు. తీరా అన్ని పత్రాలు సమర్పించి, ఎంపికయ్యాక.. బ్యాంకులు ‘సిబిల్ స్కోర్’ సాకుతో రుణాలు నిలిపివేయడం పేద దళిత నిరుద్యోగులకు గూబదెబ్బలా మారింది. స్కోర్ సరిగ్గా లేదనే కారణంతో రుణాలు రాకపోతే తమ భవిష్యత్తు ఏమిటని ఎంతో ఆశగా ఎదురుచూస్తున్న లబ్ధిదారులు ఆందోళన చెందుతున్నారు.
- Youtube Channel: Click Here
- Horror Stories: Click Here
- Entertainment: Click Here
