s400-air-defense-system-india-gets-fourth-unit-strengthens-border-security
భారత వైమానిక రక్షణ వ్యవస్థను మరింత పటిష్ఠం చేసే దిశగా మరో కీలక ముందడుగు పడింది. రష్యాతో కుదుర్చుకున్న ఒప్పందంలో భాగంగా అత్యాధునిక S-400 ట్రయంఫ్ ఎయిర్ డిఫెన్స్ సిస్టమ్కు చెందిన మరో యూనిట్ తాజాగా భారత సైన్యంలో చేరింది.
ఇంటర్నెట్ డెస్క్ : భారత వైమానిక రక్షణ వ్యవస్థను మరింత పటిష్ఠం చేసే దిశగా మరో కీలక ముందడుగు పడింది. రష్యాతో కుదుర్చుకున్న ఒప్పందంలో భాగంగా అత్యాధునిక S-400 ట్రయంఫ్ ఎయిర్ డిఫెన్స్ సిస్టమ్కు చెందిన మరో యూనిట్ తాజాగా భారత సైన్యంలో చేరింది. దీంతో దేశ భద్రతా వ్యవస్థ మరింత బలోపేతం కానుంది.
ఇటీవల జరిగిన “ఆపరేషన్ సిందూర్” సమయంలో S-400 వ్యవస్థ తన సామర్థ్యాన్ని మరోసారి నిరూపించుకుంది. శత్రు దేశాల నుంచి వచ్చే వైమానిక ముప్పులను ముందుగానే గుర్తించి సమర్థంగా ఎదుర్కొనే ఈ వ్యవస్థ కారణంగా భారత వైమానిక రక్షణకు విశేష గుర్తింపు లభించింది. ముఖ్యంగా పాకిస్థాన్ సరిహద్దు ప్రాంతాల్లో ఈ వ్యవస్థ మోహరింపుతో భారత భద్రతా వలయం మరింత పటిష్ఠమైంది.
తాజాగా అందిన నాలుగో S-400 యూనిట్ను కూడా రాజస్థాన్ ప్రాంతంలో, పాకిస్థాన్ సరిహద్దుకు సమీపంలో మోహరించే అవకాశాలు ఉన్నట్లు రక్షణ వర్గాలు భావిస్తున్నాయి. దీంతో పశ్చిమ సరిహద్దు ప్రాంతాల్లో భారత రక్షణ సామర్థ్యం మరింత పెరుగుతుందని నిపుణులు చెబుతున్నారు.
S-400 ప్రపంచంలోనే అత్యంత ఆధునిక క్షిపణి రక్షణ వ్యవస్థల్లో ఒకటిగా గుర్తింపు పొందింది. ఇది ఒకేసారి అనేక లక్ష్యాలను ట్రాక్ చేయగలదు. శత్రు యుద్ధ విమానాలు, డ్రోన్లు, క్రూయిజ్ మిసైళ్లు, బాలిస్టిక్ మిసైళ్లను వందల కిలోమీటర్ల దూరం నుంచే గుర్తించి ధ్వంసం చేసే సామర్థ్యం దీనికి ఉంది. నాలుగు రకాల క్షిపణులతో పనిచేసే ఈ వ్యవస్థ వివిధ ఎత్తులు, దూరాల్లో ఉన్న లక్ష్యాలను సమర్థంగా చేధించగలదు.
భారత్-రష్యా మధ్య కుదిరిన ఒప్పందం ప్రకారం మొత్తం ఐదు S-400 యూనిట్లను భారత్కు సరఫరా చేయాల్సి ఉంది. ఇప్పటివరకు నాలుగు యూనిట్లు అందగా, చివరి ఐదో యూనిట్ ఈ ఏడాది నవంబర్ నాటికి చేరే అవకాశం ఉన్నట్లు సమాచారం. ఆ యూనిట్ కూడా అందిన తర్వాత దేశంలోని కీలక ప్రాంతాల రక్షణ మరింత బలపడనుంది.
చైనా, పాకిస్థాన్ వంటి పొరుగు దేశాల నుంచి ఎదురయ్యే భద్రతా సవాళ్లను దృష్టిలో ఉంచుకుని భారత్ తన రక్షణ వ్యవస్థలను నిరంతరం ఆధునీకరిస్తోంది. ఇందులో భాగంగానే S-400 వంటి అత్యాధునిక వ్యవస్థల కొనుగోలు వ్యూహాత్మకంగా కీలకంగా మారింది. ఈ వ్యవస్థలు భారత గగనతలాన్ని మరింత సురక్షితంగా మార్చడమే కాకుండా, శత్రు దేశాలకు గట్టి హెచ్చరికగా కూడా నిలుస్తున్నాయి.
భారత సైన్యం ఆధునిక సాంకేతిక పరిజ్ఞానంతో మరింత బలపడుతున్న నేపథ్యంలో S-400 వ్యవస్థ దేశ రక్షణలో కీలక పాత్ర పోషిస్తోందని రక్షణ నిపుణులు అభిప్రాయపడుతున్నారు. ఈ కొత్త యూనిట్ చేరికతో భారత వైమానిక భద్రత మరో మెట్టు ఎక్కినట్లే అని విశ్లేషకులు పేర్కొంటున్నారు.
- Youtube Channel: Click Here
- Horror Stories: Click Here
- Entertainment: Click Here
- Join Whats App: Join
